ឯកឧត្តម ជាម ប៉េអា អញ្ជើញចូលរួមជាមួយព្រះសង្ឃដើម្បីនិមន្ត និងដំណើរថ្មើរជើង នៅស្រុកស៊ីធរ កណ្តាល ក្រោមប្រធានបទធម្មយាត្រា “កម្ពុជាត្រូវការសន្តិភាព”
ឯកឧត្តម ជាម ប៉េអា តំណាងរាស្រ្តមណ្ឌលខេត្តព្រៃវែង និងជាអនុប្រធានទី១ក្រុមការងារចុះជួយមូលដ្ឋាន ស្រុកស៊ីធរកណ្តាល នៅព្រឹកថ្ងៃទី១ ខែកញ្ញា ឆ្នាំ ២០២៥នេះ បានអញ្ជើញចូលរួមជាមួយព្រះសង្ឃ ដើម្បីនិមន្តនិងធម្មយាត្រាដោយថ្មើរជើងមានចម្ងាយ ៥,២១៧ម៉ែត្រ ក្រោមប្រធានបទ”កម្ពុជាត្រូវការសន្តិភាព” ស្ថិតក្នុងឃុំព្រៃដើមថ្នឹង ស្រុកស៊ីធរកណ្ដាល ខេត្តព្រៃវែង។
ពិធីនេះមានការចូលរួមពីព្រះសង្ឃចំនួនជាង២០០អង្គ និងមន្ត្រីគ្រប់លំដាប់ថ្នាក់ក្នុងស្រុក យុវជន និងប្រជាជនមានជាងចំនួន ៣,០០០នាក់។
ឯកឧត្តម ជាម ប៉េអា បានមានប្រសាសន៍ថា៖ ដំណើរថ្មើរជើង និងធម្មយាត្រាដែលត្រូវចំណាយពេលជាង១ម៉ោងស្មើនឹងចម្ងាយជាង ៥,០០០ម៉ែត្រនេះ គឺជាកម្លាំងមហាសាមគ្គីជាតិដ៏រឹងមាំនៃខឿនការពារជាតិ មាតុភូមិ ប្រជាពលរដ្ឋខ្មែរ និងសប្បុរសជនស្ម័គ្រចិត្តពីទីជិតឆ្ងាយ និងនាំមកនូវការផ្តល់ជំនឿជឿជាក់លើរាជរដ្ឋាភិបាលបន្តវេននៅនីតិកាលទី៧ របស់រដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី ប្រកបដោយពុទ្ធិបញ្ញាញាណដ៏ឈ្លាសវៃបានសម្រេចនូវលទ្ធផលដ៏ត្រចះត្រចង់ បង្កើតបានកិច្ចព្រមព្រៀងស្ដីពីបទ “ឈប់បាញ់” ដោយឥតល័ក្ខខ័ណ្ឌ និងចងចាំដឹងគុណដល់វីរកងទ័ពកម្ពុជា វីរនគរបាល និងក្រុមគ្រួសារវីរកងទ័ពកម្ពុជា ដែលបានប្ដូរផ្ដាច់យ៉ាងអង់អាចក្លាហានពលីជីវិត ដើម្បីជាតិមាតុភូមិនិងបូរណភាពទឹកដីនៃព្រះរាជាណាចក្រកម្ពុជាឧ្យបានគង់វង្សថ្កុំថ្កើង ក្រោមម្លប់សន្តិភាពជានិច្ចនិរន្ត និងសុខដុមរមនីយកម្មនៃសង្គមជាតិនិងប្រជាពលរដ្ឋខ្មែរទូទាំងប្រទេស។
ឯកឧត្តមបានលើកឡើងថា៖« យើងទាំងអស់គ្នាគ្រប់ស្រទាប់វណ្ណៈនៃប្រជារាស្រ្តខ្មែរទាំងអស់សូមថ្កោលទោសយ៉ាងខ្លាំងដល់ភាគីថៃដែលបង្កើតសង្រ្គាមឈ្លានពានយ៉ាងកម្រោលមកលើអធិបតេយ្យភាពកម្ពុជា និងសូមអំពាវនាវដល់ប្រទេសជាមិត្ត និងអង្កការអន្តរជាតិនានាចូលរួមសង្កេតការណ៍«កិច្ចព្រមព្រៀងបទឈប់បាញ់” ឱ្យកាន់តែស័ក្តិសិទ្ឋិ និងមានប្រសិទ្ធភាពខ្ពស់៕
